خبر شين ؟!
......... أثر شين الخبر ينتشر في (ســـــــــاع ) .. .. !!
/ مدخل /
دلال بنت في العشرينات .. تدرس بآخر سنة في الجامعه .. متزوجه له سنتين .. في كل عزيمة تبدأ عجز ابليس في نهش لحمها ، ولا عاد يبقى به عظمة !! (( وراه ما حملت !؟ )) .. ومن تبدا البنيّة المسيكينة تحتسي ولاّ تاقف .. ما تلقين غير عيونن تبحلق بـ بطنه .. ودهن يتاكدن بأنفسهن .. يجوز تكون حامل ومغبيتن عنهن هاللي ما تستحي ...............!!
ذاك اليوم .. حست دلال بتعب شوي .. راحت لم المستشفى .. ومن مقاريد الصدف كانت هناك وحدتن منهن ..
دلال؟؟ .. و جايتن لم المستشفى ؟؟
امممممممممممممم .. وش ممكن يكون السبب ؟؟
.. ما يبي له كلام أكيد إنه حامل و جالستن توحم !!!!!!!!!!!
و قامت دقّت على أم سعود (الراس الكبير منهن) :
آلووو .. تراي شفت دلال بالمستشفى ..
وسمعت الممرضة تقول له مبروك انتي حامل !
طيري يا أم سعود و ازهمي على خويّات الضحوية :
ترا تو داقتن علي أم محمد (أنتي ياللي بالمستشفى) و قالت لي إنه شافت دلال هناك ..
وقالت له دلال (بنفسه) إنه حامل !!
طبعا كل الردود تختصر بكلمة : صدز ؟!
.. همّن تبدأ كل وحدتن منهن تكلم اللي يعز واللي ما يعز عليه وتعلموه بالخبرية .... ترا دلال حامل و متوحمتن على رجله ... و يستمر نشر الخبر إلى ما لا نهاية .. و في كل مره تزيد " البهارات " بالهبل عن المره اللي قبله إلى ما تصير السالفه تناقز مناقز مب صاحي من كبر النصبات ...!!
.
.
.
/ زبدة حتسينا /
الاشاعات ظاهره مرضية منتشره كثير .. خصوصا بين الحريم ، و بالأخص عند القرايب .. ما غير تطلع هالخرابيط ببلاش ! .. سواء زينه أو شينه المهم فيه خبر جديد !!
يجوز إن الموضوع ما أخذ حقه في الطرح كـ مقدمه .. عشان تسذا ودنا نتكلم عن هالظاهره .. وشي أفضل فكره للاشاعات و هل ممكن تكون نافعه .. و من هم أزين ناس لترويجه (والله لو هي حبوب) .. و يا ترى لو عندنا إشاعة وشلون نقدر نوصله لأكبر عدد من الخلق ..
أغديكم تخيلون إنكم عجيّز في ضحوية .. جالستن تقدع وحوله شنطة مليانتن أدوية .. و ريحة المكان تعطعط بسبّة أبو فاس .. و ملبقتن نعيلاته حوله ، وبجنبه خويّاته اللي تكح واللي تهذر واللي تصارخ ، والمـ..... (بغينا نمسك خط عفوا)
المجال مفتوح للنقاش و البربسة بالمحاور اللي تشوفون انه داخله ضمن الموضوع ..
ما قول غير الله الله و طبوا بالعجز لا أوصيكم
.
.
/ أمّا بعد /
فكرة موضوع (ضحوية حريم) إننا راح نقدم في كل مره .. ظاهره منتشره في مجتمعاتنا اللي ما خلّت شي شين إلاّ وطاحت بوه ولا فخر .. ودّنا تجون بذيّـا و تتفاعلون معنا .. وتعطوننا من حتسيكم وسوالفكم اللي توسع الصدر .. هالموضوع مبدأيا راح تكون مدته اسبوع - قابله للتمديد و الخبن على حسب التفاعل و نوعية الفكره المطروحه - ... والمجال - للي يبي يشارك معنا بالحلقات الجايّة - مفتوحن على مصراعيه إلى ما يطقوه مصع .. عن طريق ارسال فكرة الموضوع لي - لا هنتوا - على الخاص قبل إضافة الموضوع (بالطريقة التسلسلية) لـ ضحوية حريمنا هنيّـا ..
وفــالــكــم طــيــب